I Raja-raja 1:28-48; Jabur 111; Rum 16:17-20
PEPELING
“Nanging padha dak pituturi, para sadulur, padha diwaspada marang
para wong kang padha nyulanyani ing piwulang kang wus koktampani, kang nuwuhake cecongkrahan lan panggodha. Singkirana
wong-wong kaya mangkono.” (Rum 16:17)
Gesang kita minangka tiyang pitados punika tinimbalan supados leladi. Inggih punika leladi dhateng Gusti ingkang ugi maujud leladi dhateng sesami. Supados kita nggadhahi daya gesang kangge leladi tamtu anggen kita leladi punika kabereg dening motivasi. Motivasi punapa ingkang mbereg kita leladi? Punapa motivasi kagem kaluhuranipun gusti utawi namung kangge kaluhuraning manungsa/dhiri pribadi?
Nalika Rasul Paulus ing kitha Rum, piyambakipun mirsa bilih wonten piwucal ingkang nyingkur saking sabdanipun Gusti. Pramila Rasul Paulus maringi pepeling supados pasamuwan ing kitha Rum waspada tumrap kelompok utawi golongan ingkang martosaken piwucal ingkang nyimpang, inggih punika piwucal ingkang njalari cecongkrah ing pasamuwan lan panggodha ingkang ngrisak kapitadosanipun pasamuwan. Ingkang leladi namung kangge dhirinipun piyambak, kanthi pangandika-pangandika ingkang lamis lan apus-apus. Pramila rasul paulus ngengetaken supados pasamuwan nebihi tiyang-tiyang punika. Awit kawontenan tiyang-tiyang punika badhe ngaribawani peladosan-peladosan ingkang kita lampahi.
Peladosan ingkang kita lampahi sayogyanipun kadhasaran kanthi motivasi ngluhuraken asmanipun Gusti. Kita kedah fokus peladosan dhateng Gusti kanthi setya, tuhu lan sumadya nampi saben proses kanthi sae. Leladi ing ngarsanipun gusti ugi sinarengan sikep purun kerjasama kaliyan pelados sanesipun, purun ndandosi dhiri supados langkung sae, lan nindakaken pakaryan peladosan punika kanthi mbudidaya ingkang paling sae tumrap pakaryan ingkang dipun pitadosaken Gusti dhateng kita. Kita ugi kedah wicaksana kangge mbedakaken ingkang sae utawi ingkang awon, inggih kanthi purun sinau lan nggegilut sabdanipun Gusti. Gusti mberkahi. |*SAR
