Wilangan 10:11-36; Jabur 24; Lukas 1:57-80
PANGERAN ALLAH KUWI LOMA
“Pangéran Allah kita kuwi loma, sarta akèh sih-piwelasé;
Panjenengané bakal rawuh ngluwari kita. Padha kaya srengéngé
mlethèk ing wayah ésuk” (Lukas 1:78)
Wacan Injil dina iki nyaritakne brayate Imam Zakharia. Jeneng Bapa Zakharia iku basa Ibrani tegese: “Sira Elinga”. Lha lelakon kulawarga Imam Zakharia iki dadi pangeling-eling kanggo kita. Jeneng Ibu Elisabeth tegese: “Gusti Allah-ku wis paring pangandika”. Lan ingkang putra Yohanes tegese: “Gusti Allah paring sih palimirma”. Didadekne sak ukara, lelakone brayat Zakharia dadi pepenget: “Elinga, Gusti Allah wus ngendika, paring sih palimirma marang kita.”
Sacara pribadi, Ibu Elisabeth wis ora diarani gabug maneh, kaparingan anak lanang sing bisa nerusake timbalan leladi wong tuwane, malah bakal kasebut nabine Gusti Allah sing Mahaluhur, utusan sing ndhisike prelu nyawisake dalan kagem Panjenengane kang badhe rawuh.
Gusti Allah iku loma, ora mung maringi putra marang Simbah Zakharia lan Elisabeth. Sih piwelase Gusti rawuh ngluwari umat, kaya padhange srengenge mlethek ing wayah esuk. Dadi pepadhang marang saben wong, supaya ninggal urip ing pepetenging dosa, lan lumaku ing dalaning katentremen tanpa rasa wedi. Laire Yohanes dadi kabungahan gedhe kang ngilangke sakabehing momotan lan panandhang sing nate dirasakne sadurunge.
Gusti Allah iku loma, ora mung marang brayate Imam Zakharia, uga kanggo kita wanci iki. Sih kadarmane Gusti iku sedya kanggo umat kabeh. Ora ana tembung telat anggone Gusti maringi berkah. Umur sing wis tuwa ora dadi alangan sih rahmate Gusti makarya. Nalika sih rahmate Gusti kababar, sing ana mung kabungahan ngrasakne berkah lan kabegjan peparinge Gusti. Sing patut kaaturake ing ngarsane Gusti namung pamuji, panuwun, lan sokur. Ing urip kita, sihe Gusti bisa kita andelake, ngluwari saka karupekan. Pitulungane Gusti iku loma, linuwih tinimbang sing kita suwunake ing ngarsane. Amin. |*YTP