Mustikaning Kidung 1:1-17; Jabur 45:2-3, 7-10; Yakobus 1:1-8
SETYA
“Dhuh gantilaning nalaningwang, kawula mugi Paduka wartosi, wonten pundi anggen Paduka angen menda, wonten ing pundi anggen Paduka mlegungaken pepanthan Paduka ing wanci dalu? Awit punapaa dene kawula ngantos kados tiyang nglembara celak pepanthanipun menda mitra-mitra Paduka?” (Mustikaning Kidung 1:7)
Kitab Mustikaning Kidung punika angel dipun mangertosi. Awit tembung-tembungipun kaanggep erotis ugi kaserat mawi syair geguritan. Perlu kawicaksanan tuntunan Sang Roh Suci murih kita saged mangertos kitab punika. Tokoh utama ing Kitab Mustikaning Kidung punika Pangeran Suleman, kenya Sulam (MK 6:13) lan pangon ingkang minangka kekasihipun kenya Sulam (MK 1:7). Wosing Mustikaning Kidung punika nyariosaken bab Pangeran Suleman ingkang kepincut dhateng kaelokan kenya Sulam lan mbudidaya kangge ngrengkuh manahipun, ananging kenya Sulam langkung milih setya dhateng sang pangon kekasihipun (Mustikaning Kidung 6:3).
Kenya Sulam ingkang kacariyosaken ing bab 1 punika nggadhahi watak sae sanget. Piyambakipun mboten sulap dhateng raja brana ingkang dipun tawakaken, nanging milih gesang prasaja sareng kekasihipun ingkang namung dados pangon (ayat 7). Watak kados kenya Sulam punika sampun angel kita panggihi. Kanyata, bilih bandha, kasugihan lan popularitas punika gampil sanget ngewahi gesanganipun tiyang. Bandha saged ndamel tiyang nyingkur kasetyan. Gusti Yesus nate dipun godha dening Iblis ingkang nawekaken sedaya kasugihan donya punika. Ananging Gusti Yesus langkung milih setya dhateng Sang Rama (Luk. 4:5-6).
Kathah tiyang Kristen mboten tahan nalika dipun berkahi. Pamblithuking kasugihan njiret manungsa lan njalari nyingkur saking Gusti. Wonten tiyang Kristen ingkang rila nilaraken Gusti, ngedol imanipun, lan ndadosaken Mamon minangka allahipun. Saking waosan menika, kita kaajak supados sinau bab kasetyan. Miliha setya sinaosa gesang prasaja. Kenya Sulam sampun maringi tuladha kasetyan. Tiyang ingkang setya gesangipun mesthi tentrem. “Jalaran wong kang atine mangro, ora bakal tentrem uripe” Yakobus 1:8.| *SAR